Des kaÿser Hainrichs ein getrewer verhelffer. vermercket das sein
Namenn vnd achtůng verclaÿnt wart. fordert ÿm zůgeben das
hertzogthůmb zů Baÿrn. ÿm důrch die bestenn Fůrsten vorlangst vnnd
tewr zůgesaget Daraůff der Romisch kaÿser den Fůrsten
dise anntwort gab. Ir libsten Fůrstenn ÿr wist das solchs in diser
heerfart nit kan gescheen. Wann weÿl die Baÿrnn
habenn von anbegÿnn ain freÿe gewalt zůerwelen. So wil sich nit
zcimen die Baÿrn sobaldt zůůerachten. Vnnd das alt recht an
ÿr verwilligůng nichtigenn vnd zůůerbrechenn. So aber Graff
Hainrich billicher zeit erharren wil. So wellen wir gernn mit
gemeÿnem Rath vnnd willen der Fůrsten des Raichs ÿm gnedigenn willenn
darÿnnen erzaigen Als nůn Graff Hainrich dise antwort
erfůr schlůg er ab alle hoffnůng ichts aůff die konigliche
zůsage zůerlangenn. Vnd entzog sich vonn der gemeinschafft des
Romischen konigs. Wiewol er mit dem konig in das Landt zů
Důringenn zcog.

Als dieser Romischer konig in Důringenn was kůmmen. kam