vnd Dornbůrg. mit ÿr eingehorůng bis aůff zukunfft des konigs gar
menlich bewartt het. Da kamen zů ÿm die. Herr
Giseler vonn Magdebůrg. vnd herr Lemzo vonn Bremen ErtzBischoff.
mit sambt Bischoff Rethar von Padeborn. Bischoff Berwart vonn
hÿldensheÿm. Bischoff Arnolff von halberstat. Bischoff Reinwart
von Meÿssen. Bischoff hůgo vonn Czeitz. Vnd Bischoff Bernhart
vonn ferden. Mit sambt vil hertzogenn. Fůrsten. vnd herren. Die alle
den Romischen konig erlichen enpfingen. Darnach aůff
den nechstfolgenden tag Sancti Ciriaci hertzog Bernhart von Sachssen
aúff beůelh der gantzenn Lantschafft zů Sachssen des Landts anligen
dem Romischen konig anzaigt. vnd alle not zůerkennenn fůgt. mit
vntertheniger beůelůng des gantzen landts. Welchem der Romisc h konig dise
antwort gab. Ir Allertůgentreichste Sachssenn
Got erstlich vnnd darnach eůch allen vermag ich nÿmmer gnůgsam
zůdancken. Die ÿr aůch die erstenn mein Ere eůrn nůtz sein. habt
aůff dem tag zů Werla angetzaigt. Vnd der halben von der selben
zeit her ich alleweg. hab die maÿnůng gehabt. das ÿr Sachssen aůffs
hochst allezeit eůch bevlissenn habt. vnd noch bevleisset eůrm Romischen
konig vnterthenigen getrewenn gehorsam. trost vnd hilff zůlaisten.
Darůmb weÿl ich vonn meÿnem anherren vnd Vater. vnd meinen voreldern
ewer Nacion vnd gleich eůch der gebůrt ein Sachss bin. So bin
ich dester hoher vnd williger genaigt eůch Sachssen In allenn
sachen zů eren. zůerhohen. zůlieben. vnd zů vnserm. vnd des hailigen
Romischen Raichs haÿl zůhanthaben. vnnd zůvnterhalten. Derrhalben
sag ich eůch zů. doch vnůersert des hailigenn Raichs Ere. dieweil
ich vor eůch mit eůrm gůten willenn. vnd grosgůnstigen vnterthenige
m wolgefallenn als ein Romischer konig erscheÿn. Das ich ewer
Sechsische gesetz vnd recht nicht wil verclaÿnen. Sůndern in allen
sachen lieber erfůllenn. Vnnd eůrn nůtz fůr meÿn gewÿnn achten. vnnd
eůr herschafft ÿe lenger ÿe merr meren. Daraůff alle menschen
aÿnhertziglich schrÿen. Der Romisch konig wer mit Gotlichem vnd
menschlichem recht gar billich Romischer konig erwelt. Er
were aůch solcher hohenn Ere vnnd Glorienn vor allenn andern Fůrsten
wirdig das hailig Romisch Raich zůregirn. Da gab Hertzog
Bernhart vonn Sachssen dem Romischen konig mit gůnst vnd willen
aller Sachssen das hailig Sper. Vnnd befalh ÿm das Raich. Daraůff
alle die Jhenige die vor den andernn Romischen kaÿsernn gedÿnt hetten.
die schwornn dem Romischenn konig. Hainrich aůch holt
vnnd getrew zů seÿnn.