Hertzog. Boleslaw von Polnn Hertzog. Mesico Sůn nach abgang des
Romischen kaÿsers. Otto. des drittenn. vnnd Marggraff Eckharts in
ainer solchenn grossen enporůng. nam er mit gewalt ein Lawsatz die
Stat Bůtzes. vnnd alle gegent genseit der Elb gelegen. Aůch die Stat
Meÿssenn mit verretereÿ. da er aůch vermeint vom Romischen konig
mit gelt zůerlangen. Aber dieweÿl es nit beqůem was dem Romischen
Raich So kůnt er es nit erwerbenn. Darnach wart
derselbig Hertzog Bolesla des Romischenn konigs Ritter. vnnd als
er ÿm ein zeit gedÿnt. vnd von ÿm wol vnnd reichlich begabt. hinweg
zcog. mit erlaůbnis der koniglichenn Maiestat. zcogen sein dienerr
gewappent in den koniglichenn hoff mit freůel. vnd wart ein gros
aůfrůr Derhalben hertzog Boleslaw mit hilff eÿnes Graůen die
eůssern pfortenn aůffbrach. vnnd kawmet mit seinem lebenn daůon
kam. Also meinet Hertzog Boleslaw solcher růmor hett sich aůs
arglistickait des Romischenn konigs. Wiewol dem Romischen konig nichts