Bischoff vonn Lüttich. vnnd der Bischoff vonn Camerack kamen. die
erstenn dahin wartende aůff den ErtzBischoff herib von Colnn.
Welcher darůmb das ÿn der Romisch konig Hainrich in hartem
gefencknÿs zů Pollingen von wegen des weggefůrten haÿligen spers
gehaltenn hett. noch vnwillig was. gab er fůr als wer er darůmb
So lancksam kůmmen. das der konig den ErtzBischoff von Meintz ÿm
mit der kronůng hett vorgesetzt. Darůmb dieselbenn
obinbenante ErtzBischoůe vnnd Bischoff den Romischenn konig erwelten
vnd mit dem aÿdt bestetenn. mit ÿm bis gein Ache zcogenn. Da er an
vnser liebenn Frawen gebůrt tag von den Lothringen nach altem
herkůmmen fůr aÿn Romischen konig wart aůsgerůffenn. vnd aůff den
koniglichenn Stůll gar loblich gesetzt.

Von dannen zcog dieser hailig Romisch kaÿser. Hainrich. gein Francken
den winter vber daselbst still zůligen. Aůff das er zůstůndt
zů den wetterlichen tagenn des Glentzen mocht hertzog Herman von Swaben.