schicket er zůstůndt sein botschafft zů dem Lumbardischenn konig.
vmb erlaubnÿs důrch zů zciehenn zůbiten. Welchen der Lůmbarder
konig aůs grosser arglistickait antwort Bleÿbt heint vber nacht
hie. Aůff das ich eůch morgen mit rat meiner freůndt můg widerůmb
mit antwort zů eůern herrenn abfertigen. Daraůff er die
ganntze nacht aůs an wissenn der kaÿserischen sein Folck im feldt
ligendt ansprach. ermannet. vnd stercket. mit ansagůng das sie aůf
den nechstfolgendenn tag mit den Teůtzschen zůstreitenn gerůst vnd
geschickt werenn. frw mit der morgenrote. erhůben sich die botschafft.
der Lůmbarder konig vmb antwort zůersůchen. Also merckten sie das
sich die Lůmbarder zům streÿt schicktenn. Daraůff sie fragtenn was
solch růstůng bedeůt. da erfůrn sie das die Lůmbarder wolten mit der
Romischen koniglichen Maiestat Folck streiten . Vnd wůrden aůch
daraůff geheissen wider zů den ÿrn zůzciehenn. Welchenn derr
Lůmbarder konig aůff dem Fůss nacheÿlet. mit seinem here. bis an
ein Berg. Da des Romischenn konigs Folck der botschafft wartet.
den sie mit der sůnnen erlangten. welche der konig zům widerstant vnd
streyt berait vnnd willig befandt. Darůmb streÿten sie baidersaits
gar hertiglich miteinander. Aber hertzog Otto vnd die andern
der Romischen koniglichenn Maiestat lewt fůrten den streit gar
vnůorsichtiglich. Derhalben sie aůch gar schier das gantz heer hetten
verlornn. Dann sie gabenn die flůcht. vnd wÿchen vor dem grossenn
here der feÿndt. Sůst hettenn die Teůtzschen den Sÿg behalten. Wiewol
aúch die Lůmbarder grosser anzall wůrdenn erschlagen. Welcher
vnfall. Hertzog Otto vonn kerten [lies: Kernten] ser hoch zů hertzenn gieng. Vnd
diser hertzog Otto ist gewest ein Sůn Frawenn Ludgart des Grossen
Romischen kaÿsers. Otto. tochterr. Vnd offtbenanten Hertzogenn
Cůnrad ts vonn Francken Vnnd was gar eÿnn
Tůgentreicher Fůrst. vnnd also frům vnnd loblich das er nach abgang
des drittenn Romischenn kaÿsers. Otto. als desselbenn angebornner
Freůndt. vonn disem Romischen kaÿser. Hainrich. die zeit noch
Hertzog allein zů Baÿrnn. zů ainem Romischen konig erwelt wart.
Aber er wolt solch gros půrde. aůff sein schůldernn nicht nemen.
Sůndern disem hailigen Romischen kaÿser. der erst. vnnd vor allenn
andern Fůrstenn důrch sein botschafft. aůch Inn aÿgener personn als
tůglicher zů solchem hohenn standt ym vorsetzt. Vnd ÿm
gar getrewe hilff in allenn sachenn ertzaigt.