Crewzin. an welchem endt Marggraff Hainrichs brůder Bůggo
solt seines brůders gemahell Gerbůrg vmb gůter vestůng willen
derselbenn Stat. mit sambt ÿrenn kinden bewarn. Also leget sich
der Romisch kaÿser fůr die Stat. Vnd nachdem sie vonn natůr vnd ÿrer
gelegenhaÿt gar vest vnnd starck was. thet Marggraff Hainrich den
kongischenn vil widerstants. Er verwůnt vil lewt. Aůch totet er
etliche die vnúorsichtiglich fůtterůng holten. Darůmb
erdacht der Romisch kaÿser mit grosser fůrsichtigkait ein weg. solchem
vber fůrzůkůmmen. Wann er legt ann ein ordt heimlichen
vierhůndert Reůtter. die er in ein tall damit bezwang sich
zůgeben. Da sich nůn die feÿndt daselbst lagertenn. Vnd ÿr gezelt.
aůfschlůgen. Verriet sie ein Pawr. gegen den kongischenn. Die In mittem
tag. da die sůnnen am haistenn was. die feindt vberfielnn.
Vnnd also bald sie ÿr gewar wordenn vnd ansichtig. růfften sie
ÿr gesellenn zůsammen. důrch die wort kirieeleÿson. Die zůstůndt
alles das ÿr verliessenn. vnnd die flůcht gabenn. Also fingen die
kongische oben gedachtenn Ritter Ernst. den sie dem Romischenn
konig antworttenn. Welcher aůch wart zůstůndt zům todt getailt.
Aber er wart entlich důrch vorbit des ErtzBischoffs Willigiss
vonn Meintz ledig. Da nůn Graff Bůggo hort das sein
brůder vnnd anndere seine gůte freůndt also flůchtig warn worden.
betrůbt er sich fast serr. Vnnd fordert sein Lewth zůsammen. Vnnd
bat sie vmb rat. wie er sich in disenn sachen haltenn solt. Die
vntereÿnander selbst zweÿtrechtig warn. Wann etliche
rieten. sie wolten vil lieber sterbenn. Dann dem Romischen konig
die Stat vbergebenn. Dann weÿl ÿr alter herr noch Im leben
wer. hetten sie noch gůt hoffnůng. es wůrd ÿn hÿlff von ÿm widerfarn. Die
ander als verstendigste. Sagten es wer gar schwer wider den stram
zús chwÿmmen. Vnd wider ein mechtigenn zůstreÿtenn. So erwůrben
aůch die widerspennige. wenn sie vberwůnden wůrden. selden. oder
gar schir nÿmmer vergebůng vnd gnad. Darůmb wolten sie
solchs vnnd anders angesehen. lieber vnůerserts lebens vnd
vnůerwůndt den Romischenn konig vmb gnad biten. vnbeschedigts lebens
weg zůzciehenn. Welchem rath fiell Graff Bůggo zů
mit sambt seinem brůder Graff Otto. Derhalben redtten
sie baÿde mit der frawen. vnnd vbergabenn die Stat also mit ÿrm
wissenn vnd willen. der Romischen koniglichenn Maiestat. vnnd
zcogenn freÿ vnnd sicher miteinander hinweg Daraůff
der Romisch konig die Stat hies in grůndt einbrechenn vnd verstornn.