Weÿl der hailig Romisch kaÿserr. hainrich. vor bemelter Stat Crewzin
lag. bevlÿs sich Hertzog Boleslaw vonn Polnn. mit seinem hochstenn
vermůgen. dem Romischen konig ein schaden zůzewenden vnd bracht
ein heer heimlichen in solchem fůrnemen zůsammen. Vnnd
erInnert důrch sein Botschafft Marggraff Gůntzelÿn seinen brůder
Das er wolt eindechtig sein seiner zůsage. vnd Im die Stat Meÿssen
widereingebenn. vnd die alde Freůntschafft wider vernawen. Aber
Graff Gůntzelÿn wůst das. wenn er hertzog Boleslaw ein lies. das
er wůrd in schwer vngnad der Romischen koniglichenn Maiestat
fallen. Darůmb er diese antwort des Boleslaw botschafft gab.
Meinem brůder wil ich gern in allen sachen brůderliche trewmaÿnůng
erzaigen. vnnd aller annder seiner bit gernn stat geben. aůsgenůmmen
dise bit. Wann ich hab etliche kongische reůtterr beÿ mir die
solchs in kaÿn weg werden leÿdenn. Vnd wann solch fůrnemen aůsbrech.