Hainrich vonn Norckaw sein Landt gar verhert vnnd verlÿhen hett.
zcog er gein Bamberg. vnnd gab seinem here erlaubnis sich zůtaÿlnn
vnd heim zůziehenn. Vnd bleib zů Bamberg. vnnd hielt vnser liebenn
frawen gebůrt tag da. Darnach zcog er aůff die Ihaget in Spechshart.
erqůickůng der bescheen múd vnnd vnrů zůnemen. da er den herbst
mit Ihagenn verbracht hett. zcog er důrch das Franckenn Lanndt In
Sachssen. Vnnd gebot aůff in seinen Landen. aůff nechstkůnfftigen
Glentzenn wider die Wendenn Milcienos genant zůziehen. Also
hielt er den hailigenn Cristtag zů Poÿlde. Darnach zcog er gein
Dornbůrg. Da er aůch důrch gotlich lieb beweget. nit lenger des
ErtzBischoůenn Giselers von Magdebůrg vngerechtickeit kůnt
leidenn. zů ÿm den ErtzBischoůenn Willigis von Meintz schicket.
mit sambt etlichenn andern, wiewol die zeit kranckendt. Vnnd lies
ÿn ver manen das er vmb gottes willen. wolt das ErtzBisthůmb zů
Magdebůrg verlassenn. vnd sich wider zů dem Bistůmb zů Mersbůrg
gebenn. das er vnbillich hett verlassenn. Inn ansehůng Sůnderlich
das er nůn an das endt seines lebens kůmmen werr. Welchen
gedachter ErtzBischoff kaůmet dise antwort kůnt gebenn. Mann geb
mir allein dreÿ ader Vier tag fristůng. das ich mag vondannen kůmmen.
Dann So wil ich eůch ein gewÿs antwort geben. Da er
solchs von dem Romischen konig erwarb. Lies er sich aůff seiner Sitz
ainen Tribůr genant fůhrn. Vnnd als er daselbst zwen tag
gelegenn was. starb er am Fůnffvnndzweintzigsten tag des Ieners
Derhalbenn der hailig Romisch konig mit der leich bis gein Magdebůrg
zcog. vnnd schicket seinen Capellan Wigbrecht. vorhin. vonn dem
Capittell zůerwerben das sie woltenn Taginon Sannt Wolffgangs
discipell zů ÿrm ErtzBischoff erwelenn. Aber sie hettenn beraÿt ÿren
Probst Walthardt erwelt. Inn besorgúng sie mochtenn
der erwelůng berawbt werdenn. Aůff den morgenn erlangt der Romisch
konig důrch den Bischoff Arnolff vonn halberstat. das der benant
Probst mitsambt dem Capittel den Taginon zů aÿnem ErtzBischoff
erwelten. Alsobald sammelten sie sich in der hochstenn kirchenn.
Da der Romisch konig mit des Bischoffs vonn Halberstat stab. dem
Erwirdigenn Vater Taginon das ErtzBisthůmb zů Magdebůrg
befal. vnnd In den ErtzBischofflichenn stůl setzet. Da nůn
der ErtzBischoff eingefůrt was. zcog der Romisch konig mit ÿm gein
Gÿbichensteynn vnd besichtiget da alle ding. Darnach zcog er mit
ÿm gein Mersbůrg. Welch Bisthúmb lange zeit kain
Bischoff gehabt hett. In maÿnůng demselbenn trostůng vnnd seÿnes
vermůgens gnedige hilff zůerzaigen. Da aůch der Bischoff Tagino von dem
ErtzBischoff willigis von Meintz an vnser lieben Frawen lichtmestag.
in gegenwart des Romischen konigs der Bebstlichen botschafft vnnd
vil Bischoůen gekront wartt.