Dieser hailig Romisch kaÿser. hat aůch das Bistůmb zů Mersbůrg wider
in gůtenn rat bracht. Vnnd loset dem Bischoff Arnolt von halberstat
hůndert hůff Lanndes widerr ab. die ÿm von dem Bischoff von
Mersbůrg versetzt warnn. Auch bevlÿs er sich wider an dass
Bistůmb zu Mersbůrg zůbringenn. alles das an die zweÿ Bistůmb
zů Meÿssen vnnd Naůmbůrg kůmmen was. Aůch befal er dassselb
Bistůmb seinem Capellan Wiprecht. Vnnd gab ÿm damit wider
alles das vom Bistůmb zů Mersbůrg kummen was. Daraůff
aůch der new Bischoff Wiprecht zů Mersbůrg vom ErtzBischoff
Tagino zů Magdebůrg zů Bischoff geweihet wart. Vnnd ist
Bescheen nach Cristi gebůrt Tawsent vnd Im Fůnfften Iharr.