Inn mitler zeit Hertzog Poleslaw vonn polnn beweget důrch sein
aÿgenn tolhait. Aůch zům tail důrch eingebůng Marggraff
Hainrichs. teth den Baÿrnn vil gewalts vnd schadens. Derhalben
der hailig Romisch kaÿser sich mit ainem heer wider die Wenden.
Milziener gnant erhůb. Vnd zcog in ÿr landt. Welchs er
aůch In grůnt verhert hett. wann der vbergros schmee schnelliglich
zůgangen. yn nit verhindert hett. Sůst wer dasselb Landt
also verderbt wordenn. das kain mensch darÿnnen hett kůnnenn
wonen Darůmb zcog der Romisch konig trawrent wider
zůrůck. Marggraff Gůntzelin vnd andern die er in seinenn
Landen dieselben zůbewarnn. hett gelassenn hilff zůerzcaigen.
vnnd kam gein Mersbůrg. da er aůch erfůr das sein brůder zům
konig vonn Vngarnn geflohen was. gnad zůerwerbenn.