Die zeit trat Marggraff Hainrich vonn Norckaw in rew seins
vilfaltigenn schweren vngehorsams dem Romischen kaÿser erzaigt
vnnd schicket zů dem hailigenn Romischen kaÿser vmb gnad bitendt.
Welche botschafft der Romisch konig aůff vorbit des ErtzBischoffs
Taginon vonn Magdebůrg. vnnd Hertzog Bernharts von Sachssen
verhort. Daraůff er Marggraff Hainrich wider gnedig
zůsein. mit disem beschaid zůsaget. das er ym. vnd den seinen ÿr
gůter widergebe. vnd das er ÿn wolt gefencklich haltenn. So lang
es ÿm gefiell. Derhalbenn Marggraff Hainrich sein
mÿshanndlůng erkent. vnnd in gestalt vnd claÿdůng eÿnes bůssers
dem Romischenn konig zůfůssenn fielh. Důrch Welchs befelh derr
ErtzBischoff vonn Magdebůrg aůff das gedacht Schlos Gÿbichensteÿn
wart gelegt vnnd gar vleÿssiglichenn bewart.