Lothringer zůder mawern einbrachen. Vnd teten den Bůrgern zů
Paůÿ So grossenn zwang. das ÿr nit aÿner hett sich důrffen aůss
seinem haws erheben. Derhalben sie zů Oberst aůff ÿrenn
hewsern stůnden. vnnd zů den kongischen mit steÿnen warffenn.
vnd mit pfeÿln einschossen. Aber die kongische Steckten die hewser
an. Also verdarbenn die vonn Paůÿ in ÿrenn hewsern. Vnd ist schwerr
zůsagenn wie gar vil Folcks. vnd wie manchfeltiger weÿs da zů Paůÿ
tot bleÿb. Da nůn die kongische Ritterschafft. den Sÿg wider die
vonn Paůÿ behaltenn hettenn. nam sie der erschlagenen weher. Důrch
welch grawsam vnd erbermlich awgenplickenn wart der Romisch
konig bewegt zů erbarmůng. gebot seinem folck. der Jhenigen vonn
Paůy die noch lebtenn zůůerschonenn. Vnd er fůgt sich Inn Sant
Peters Vesten. vnd gab den feinden aůff ÿr erbermlich ansůchenn.
gnad vnnd vergebůng ÿrer mÿshandlůng. Důrch welchen loblichenn vnd
glůcklichen Sÿg die annder feÿndt des Romischen konigs alle entwer
personlich erscheÿnen. Oder aber ÿr bůrgen vnnd pfandtschafft schickten
dem Romischen konig. mit gelůbd. getrew. vnterthenig. vnd dinstwillig zůsein
Solche ernstliche straff den von Paůÿ ertzaigt. vnd anders vbelss
zůmeÿdenn.

Als nůn der hailig Romisch kaÿser Hainrich der von Paůÿ freüell.