zůstůndt vom Romischen konig mit allen wirdenn vnd Eren. als
sein Vater begnadt wart. vor allermeniglichenn dahin gefordert. Da
nůn der Romisch konig vnnser lieben Frawen gebůrt Fest gehaltenn.
vnnd alle sachenn zů Prag wol geordennt hett. Lies er die Baÿrnn
wider heÿmzciehenn.

Darnach zcog der hailig Romisch kaÿser mitsambt Hertzog Jaremir wider
die Wenden Milziem genant. vnnd beleget die Stat Budizm. Welche in
grůnt verbrant wer wordenn. wann es nit důrch Marggraůen Gůntzelÿn
erwert werr Es wůrdenn baÿder saits ser vil Lewth verwůndt. Aůch
vil vmbgebracht. Nemlich von den kaÿserischenn aÿn Edlerr Ritterr
Hainnzo. Welcher als er die wenden zumermalln aůs der Stat gebracht
hett. vnnd vil streit mit ÿn gehabt. eÿlt er ÿn entlich bis an die maůrn
nach. Da er mit eÿnem halbenn můlsteÿn wart geworffen. vnd also verletzt.
das er zů der erdenn fiell. Daraůff er von den wenden mit gewalt in die