Also das der Romisch konig vernam. lobt er Got mitsambt aller
geistlickait vnd dem gemaÿnenn Folck. Vmb so hoche woltat. Vnnd zcog sicher
vnnd frolich an ÿdermans hinderůng vber die Oderr Derhalben
die kaÿserische hetten an zweiůell die Polnn ÿn ÿrm herr vberfallen.
vnnd alle erschlagenn. wenn sie nit von den Lawsatzern wern daran
verhindert wordenn. Also da die kaÿserische den feÿnden hetten fast
nachgefolget. vnnd sie weÿt verIaget. kamen sie entlich wider in das
heer. Also zcog der Romisch konig nach der Apteÿ Mezeritze
gnant. Da er den seinen verbot mit grossem Ernst dem Closter nit
schedlich zůsein Da er aůch Sannt Maůricÿ fest gar wirdiglichen ereth.
Darnach folget er seinem feÿndt Hertzog Boleslaw stets so hart nach. das er
sich kain nacht dorfft in seyner Stete aÿnen wagenn. vnd verhert ÿm alle sein
Landt. Also wart er gebethen von seÿnen herren vnd Ritterschafft sich daselbst
zůlagern. Welchs er also zwů meÿln von der Stat Posna tet. An welchem endt das
koniglich heer der fůtterůng zestrawet vnd getaÿlt vil schadens von den feinden entphieng.