Weÿl nůn die Sachssenn beÿ diesen zeitenn hetten vil feintschafft Vnd
súnderlich gegenn Ostlandenn die Wenden vnd gegenn Nortlanden
die Dhenen. Darůmb verzcúgen die wenden den krieg. mit
listickait Wann sie wůsten wol das der Romisch kaÿser vil
widerwertige het. Aber wiewol er soůil widerstandts lid. doch erschÿn
ym ein gůt vnd gnedig glůck. Wan bey denselben zeiten was eÿn
wendischer Fůrst mit Namen Thugmmr [lies: Thugumir] vom Romischenn konig. Hainrich. ÿn zů
geordent. vnd der ÿr rechter herr sein solt. Beůor der haůel
wenden. die aůch Henelli. von dem wasser hauell werden gnant. Welcher
důrch gifft vnd gab. vil grosser verheÿschůng bewegt. dem kaÿser
hoh zůsaget ym das gantz Folck der wenden vnterwůrffig zůmachenn.
Derhalben er aůch gleich als wer er dem kaÿser aůs dem gefencknis
entwordenn.. gein Brandenbůrg in die Stat kam. Vnd als er daselbst
erkant. vnnd als ein herr angenůmmen. erfůllet er in kůrtz sein zů sage