als darnach der Romisch konig zú Regensbůrg die hailigen Ostern hielt.
kamen zů seÿner koniglich Maiestat. etlich botschafft der Lawsatzerr.
die aůs der Stat Wÿlni. Aůch des hertzogenn Jaremirs von Behem. vnd
gabenn dem Romischen konig zůerkennen. wie das der Hertzog Boleslaw
vonn polnn vil vnbillichs vnd schedlichs fůrnemens gebraůcht. Darzů
sie von ÿm aůch mit geldt vnd rede wůrden geraÿst vnnd beweget. Aber
dieweil sie des mergemelten Hertzogen Boleslaůs arglistig gemůt woll
wůstenn. hetten sie solch sein fůrnemen. der Romischen koniglichen Maiestat.
vonn wegen des Bůndts den sie mit ÿm hettenn. nit wellen verhaldenn.
Mit anzcaigůng So der Romisch konig den gedachten hertzog vonn Polnn
in gnadenn hielt. das so dann sein koniglich Maiestat wůrdt vonn den
Behemen kaÿn getrawe dinst mer habenn. Welchs alles der Romisch konig
mitsamb t den Fůrsten vnd seÿnen Rethen vleissig betrachtet. vnd wiewol er
merckt das ÿr antragenn betrieglich vnd vngerecht was. Dennoch
verwilligt er entlich in ÿr fůrnemen. Demnach der Romisch konig
zů dem hertzogen vonn poln schicket seÿnen aÿdam Marggraff Herman
vonn Meÿssen. ÿm denn Bůndt vnd frid wider abzůsagenn. Als nůn
Hertzog Boleslaůs vonn poln hett gehort. der Romisch koniglich Maiestat
Botschafft gewerb. entschůldigt er sich in vil sachenn. Entlich sageth.
das der ewig Got Cristůs sein gezewg wer das er wůrd gedrůngen vnd
benotigt zůthůn das aůch wider sein willen werr. Vnnd bracht ein
gros heer zůsammen. vnnd půcht ein dorff aůs nit fernn vonn Magdebůrg
gelegen mit namen Morzin. vnd verderbt damit die Brůderschafft
dareÿn er sich mit den von Magdebůrg gegeben hett. Darnach
zcog er gegenn Zcerbst. vnd fůrht vil Bůrger daselbst hinweg.
Als solchs die vnsern erfůrn. sammelten sie sich. vnnd folgten den
feÿnden wiewol vil zůlancksam nach. Vnnd da sie gein Jůtterbach kůmmen
warnn. sahen sie fůr das beste an. das sie wider vmbkerten. vnnd In
kain weg den feÿnden mit so klaÿner anzcall folgtenn. Angesehenn das
sie sůst mochtenn von den feÿnden beschedigt werden. Also zcogenn
sie wider zůrůck. Aber hertzog Bolesaw lies sich an dem begangenn
schadenn nit benůgen. Sůndern nam ein Lindizi. Zara vnd Selpůli Aůch
kůrtz darnach leget er sich fůr die Stat Bůdezin. Welche mit seÿnes
aÿdams Marggraůenn hermans Folck besetzt was. Vnd schicket sein
Botschafft zů gedachter stat. mit vermaÿnůng sich zůergeben beÿderr
saiten vnkost vnd můhe zůůormeÿden. Aůch Inn betrachtůng das
sie sich kaÿner hilff důrfften. vonn ÿrm herrenn verhoffen. Also.
machtenn sie frid in allenn Landen. In mitler zeit růstet sich
der hertzog zům ernst. Vnd die in der Stat batenn Irn herren. vnnd die
Fůrstenn des Raichs vmb hilff aůffs allerdemůtigst důrch ÿr bo
tschafft. Derhalben Marggraff herman důrch sein botschafft seinem Folck
gůten trost gab. Eÿlendt gein Magdebůrg zcog. vnnd mitsambt dem Probst.
Waldtwart alle Fůrstenn důrch botschafft ersůcht. sich ÿrer verweÿlůng