dienernn vnd gehorsamen aůff. mit ÿrerr wehr gein Welgernn
zůkůmmen. Welchs nach aůslegůng der wendischenn sprach zů teůtzsch
haist der Schonberg ader weÿsberg. diezeit des Marggraůenn Gero.
Vonn meÿssen. Derhalben aůch hertzog Bernhart von Sachssen
vnd herr Waldthart Probst zů Magdebůrg vorhin geschickt wůrdenn.
zůůersůchenn ab sie kůnten hertzog Boleslaw von seinem fůrnemen
bringenn. Aber sie befandenn kaÿn glÿmpff vnd nichts gefelligs beÿ
ÿm. vnd kamen also widerr. Aůch kam mit ÿn der hertzog Jaremir von
Behem der dem Romischen konig gar getrew was in allenn sachenn. Do
zcogenn sie vber die Elb. bis gein Gernstat. Welche Stat in vorzeiten
von dem grossenn Gero gebawet was. Da wůrden zwen Bůrgerr von Bra
ndenbůrg des Landts Verreter gefangen. vnd gehenckt. Da wart aůch
der Romisch konig ser kranck. darůmb er mit dem ErtzBischoff Taginon vonn
Magdebůrg vnd etlichenn andern Bischoffen fast swach. vnd mit wenig
Lewthen vmbkert. Aber die Bischoff So beÿ dem kaÿser warn. mitsambt
hertzog Iaremir vonn Behem. vnd den zweÿen Marggraůen Gero vnd Herman vnd
vil andern verherten. Selentz vnd Deÿdissenn vnd zcogenn vor Gollga
In welcher Stat hertzog Boleslaw was. vnd sie wol gesehenn kůnt.
Da reitzten sie sein Ritterschafft aůff der maůrn mit ÿn zůstreiten.
Darůmb sie hertzog Boleslaw vonn poln baten ÿn solchs
zůerlawben. Welcher ÿn dise antwort gab. Das heer das ir sehet das
ist claÿn an der zcall. aber gros an der stercke. vnvberwintlich
vnd aůs vil taůsenten aůserlesen treffen wir mit ÿn wie vberwinden
ader werden vberwůnden so sein wir hinfůr verlorn. So ist dem Romischen
konig můglich ein ander heer zůůersameln. vnd wider aůff vnns z
ůziehenn. Darůmb wirt vnns vil besser vnnd nůtzer sein.
das wir itzt gedůlt habenn. vnd hinfůr an disen hoffertigen teůtzschen
wann wir vnsern vortaÿl ersehen wider gelt thůn. Als sie nůn dise
antwort verhort hetten schweÿgen sie. In dem zcogenn die Behem
wider heÿm. Vnd die kaÿserische zcogen důrch das Lanndt Milciener (.
Welchs ein wendisch Folck ist. ) wider an die Elb. vnd schicktenn
vorhin zů dem Romischenn konig ÿr botschafft seiner koniglich Maiestat
anzcaigendt das sie glůcklich vnd vnůerletzt widerkemen. Welcher
newlich gesůnt wordenn was. vnd sie erlichen zů Mersbůrg entpfieng.
Der ErtzBischoff Tagino vonn Magdebůrg von dem
Romischen konig zů Strela abgescheÿdenn. Als er Sant Maůriciůs
Fest zů Magdebůrg gehaltenn hett. zcog er wider zů dem Romischenn
konig zů Mersbůrg ligendt.