zúsammen. Vnnd leget sich fůr die Stat Lÿbůs. Vnnd nachdem er wůst
das die Sachssenn den Bůrgern vonn wegenn der vbergrossen Elbe nit zů hilff
kůnten kůmmen. teth er ÿn vil schadens. vnd bemůhet sich mit allem vleÿs
die Stat mit gewalt zůerobbernn. Aber es geschahhe gering rettůng
aůs der Stat. wann es warn nit mer dann taůsent mann die da rettenn wiewol
doch kaůmet an dreÿ taůsent gnůg wer gewest. ein solche grosse
Stat zůerhaldenn. Also wůrden von den Ihenigen die rettůng aůs derr
Stat teten gefangen die Edle Rittere Gumelin vnd wÿso. mitsambt dem
Stat pflegerr. Welche aůch aůff beůelh hertzogen Boleslaw hinweg
gefůrt wůrdenn. gefencklich zůhalden. Vnd wiewol er die Stat gewan.
doch wůrden ÿm von seinem Folck wol fúnffhůndert mann erschlagen.
Am neůn vndzweintzigstenn tag Aůgůsti. Vnd als er nůn die Stat
gewůnnen hett. Vnd was er von gůtern darInn befůndenn vnter sein Folck
getailt hett. zůndt er die Stat an. Vnd brent sie aůs. Vnd zcog
also mit Sÿghafftigenn heer wider daůon.

Da solchs der hailigenn Romischen konnigÿn Sant Kůngůndt. abWesens
ÿres herren des Romischenn kaÿsers zůerkennen gegeben was.