Als nůn kaÿserr Hainrich. den hailigenn Cristag zů Poÿlde loblichenn
gehaltenn hett. zcog er gein Alstet vnd lag der hailigenn dreÿ konig tag. da
still. vnd hort die Botschafft Hertzogen Boleslaw vonn Behem. vnd
seines Sůns Mesico aůffs demůtigst bittendt. vmb gnad vnd Fride.
Darnach zcog er gein Mersbůrg. Vnnd als er wenigtag da warr
gelegenn. zcog er gein Magdebůrg vnnser lieben Frawen Lichtmes mit
sambt dem ErtzBischoff Gero vonn Magdebůrg frolichenn
zůhaltenn Dahin kam Hertzog Mesico. hertzogen Boleslaw
von Polnn Sůn. mit ser grossen gabenn. Vnd wart der Romischenn
koniglichenn Maiestat nach erlangůng seiner koniglichen gnadenn
Ritterr. Vnnd gelobt hinfůr dem Romischen konig holt vnd getrew
zůsein.