vormals nÿe ernstlich gestrafft warenn Wann des Marggraůen Geronis
soldener warnn důrch vil reÿse vnnd zcerůng in armůth gefallen.
Vnd sie wůrden selden mit kaÿserlichen gabenn geerth. Auch
wegerten die Wenden den zins vnd das tribůt zůgeben. Deshalb
sie ÿm gehessig worden. Aber der kaÿser zů fůrderůng des gemainen
nůtzes ym stets beholffen was. Derhalbenn sie ÿrn hass.
wider den Marggraůen Geronem fůrgenůmmen auch aůff den kaÿser
selbst wendten. Das alles wůst Hertzog Hainrich. kaysers. Otto.
brůder wol. horet solchs aůch gernn. Vnd schicket yn vil gaben vnd
botschafft. verhoffend důrch ÿr hilff vnd gůnst Romischer Konig
zů werdenn. Vnd gieng etlicher massen nach seiner maÿnůng. Wann
mit gedachten seinem fůrnemen. hett er an sich vnd zů seÿnen gůnnern
gebracht alle r Ostgegent Ritterschafft vnd Manschafft. Vnd wart aůs
claÿnen fůnckenn ain grosfeůr. Dann sie machten ainen Bůndt.
vnd schworn zů hawff den kaÿser aůff die nechsten Osternn
zů Qůidlingenbůrg. Oder aber als etlich habenn zů Magebůrg zů toten.
Vnd hertzog hainrich darnach zů Romischen konig zůerwelenn.

Der Romisch kaÿser Otto. wart kůrtz vor dem hailigen Ostertag gewarnet.