in solchem fůrnemen aůs zů Mersbůrg am ainvnndzweintzigsten tag des
herbstmonds. Vnd kam gein Trient. da des hailigen kaÿser hainrichs
heer sich sammelt. zů welchem Rom zcog vil benanter hertzog Boleslaw
Wiewol darzů gefordert nicht kam. Sůndern bleib wie vor in seiner
arglistickait. Lies sich aůch an solcher seiner Boshait nit benůgenn.
Sůndernn beclagt sich gegenn Bebstlicher hailickait schrifftlichenn
wie das er den zins. So er der hailigen Romischen kirchenn geredt hett
zůbezaln důrch heimliche arglistickait des Romischen kaÿsers verhindert
wůrde. Aůch schicket er etliche zůer farnn. wie der hailig Romisch kaÿser
Hainrich. von den welschenn Fursten vnd Herren wůrd angenůmmen. ÿm
aůch dieselbenn abfellig zůmachenn. soůil er důrch sein schalckhait
vermocht. Da nůn vorgedachter konig Hartwig von
Lůmbardeÿ des hailigen kaÿserr. Hainrichs. ankůnfft vnd Rom
zcog erfůrr. Nachdem er ÿm widerstant zůerzaigenn zůschwach was.
floh er aůff ein vberfest Sloss. vnnd betrůbt sich serr das derr
hailig kaÿser Hainrich die kaÿserliche kron enpfaenn wůrd. Entlich
schicket er aůch aůff vil bedenckenn sein botschafft zů dem hailigenn
kaÿser. vleissig bittendt. das er ÿm ein Grafschafft wolt gebenn.
Mitt erbiettůng das er sodann ÿm wolt die kron des Raichs In Lůmbardeÿ
vbergebenn. Aber kaÿser. Hainrich. aůff rat vnd
wolmaÿnůng etlicher vernůfftigerr solchs in kaÿn weg annemen
wolt. Wann er merckt das ym vnd den seÿnen vil vnfůgs
vnnd schadenns in zůkůnfft daraůs wůrd kůmmen. Also wart der
hailig k aÿserr. Hainrich. von allenn ErtzBischoůen Bischoffen.
vnd andern Prelaten. Fůrsten. vnd herren lange zceit mit grosser senůng
verhofft. vnd bis aůff die zeit von den feÿnden alleweg
verhindert. mit ser grossen eren enpfangen vnnd angenůmmen Darůmb
aůch der hailig kaÿser hainrich. mit sambt der hailigen kaÿserin Sant
kůngůnden. glůcklichenn Vnnd von nÿmants verhindert aderr
beschedigt důrch Welsche Lanndt gein Rom kam.
Als nůn dieser hailig Romisch kaÿserr Hainrich glůckseliglich gen
Rom kůmmen was. wart er sambt seiner eelichenn gemahell der
hailigen Romischen kaÿserin Sannt. kůngůndt. Von Bebstlicher
hailickait Babst Benedicto dem Achten vnd aller gaistlickait aůffs
allerr wirdiglichst vnd erlichst entpfangenn vnnd angenůmmen.