Miniatis kirchenn aůff ainem gar hohen Berg vor Florentz gelegen.
gebawet. Darnach zcog der hailig kaÿser. hainrich. in Teůtzsch Landt
vnnd hielt den hailigenn Cristag zů Poÿlde. Vonn dannen zcog er gein
Mersbůrg. vnd fordert vor ÿn Hertzog Vlrich von Behem. Vnd hertzog
Boleslaw vonn poln beÿ kaÿserlichem bann. sich entwer zůentschůldigenn
vnd zůůerantwortten. Oder aber erstatůng zůthůn. Derhalben hertzog
Vlrich kam vnnd sich entschůldigt. Aber hertzog Boleslaw aůssenbleib
Demnach der hailig kaÿser Hainrich Im selbigenn Sůmmer mit einem
grossen heer in Poln zcog. nach Cristi gebůrt Tawsent vnnd
Im Fůnffzehenden Iarn. Jnn mitler zeit wart konig
Hartwig vonn Lůmbardeÿ ser frolich. das der Romisch kaÿser aůs
Welschenn Landen wider anheÿm gezcogenn warr. Vnd nam die Stat
Vercell ein. Vnd Bischoff Leo kam schwerlich daůon. Aůch alles w as er vmb
her erraichen kůnt. greiff er an. vnd fiell wider in sein vorig hoffartt.
Wiewol ÿn die gotlich gerechtigkait darnach ser erniddert vnd demůtiget.

Nach Cristi gebůrt Taůsent vnnd Im Vierten Iar kam aůff den
hailigenn Cristag zů dem hailigenn kaÿser. Hainrich. der Bischoff von Bernn
mitsambt etlichenn den trefflichsten aůs welschen Landen mit grossem geschenck.