Jnn mitler zeit als hertzog Boleslaw vonn Poln erfůr das der hailig kaÿser
hainrich. vnd hertzog Vlrich vonn Behenn die hailigen Ostern mit einander
zů Mersbůrg gehaltenn hettenn. thet es ÿm wee. vnd vergůnst dem
hailigenn kaÿserr. Hainrich. solch sein vilfaltig glůcklich zůsteenn.
Vnd nam Inn sein Falsch vnd betrieglich gemůt den kaÿser heimlichen.
zůbetriegenn Derhalben er zůdem hailigen kaÿser sein Botschafft
schickt aÿn man gnant Stoÿmew. mitsambt Marggraff Herman. mehr den
kaÿserr zůbetrůben dann frid zůbegern vnnd zůschaffen. Es wart
aůch scheinig vnd offenbar das hertzog Boleslaw wie vormals mit derr
sachen betrieglichenn vmbgieng. Wann er wart vom dem hailigen
kaÿser gefordert vor ÿm zůerscheÿnenn Aber wolt solchs nit thůn.
Vnd in kain weg sich zů billichem verhor gebenn. Lies sich aůch
an so manchfeltiger seiner boshait nit benůgenn. Sůndern nam fůr aůch
hertzog Vlrich vonn Behem zůbetriege n. Vnd dem hailigen kaÿser
abfellig zúmachen Daraůff er zů ÿm sein Sůn Mesico schicket. vleÿs