mitsambt dem Bischoff Meinwerck von Padebornn. Darnach
als Hertzog Ernst vonn Francken vonn seyner Ritter ainem. wiewol vngern
auff ainer Ihaget erschossenn was. Verleÿh der hailig kaÿserr Hainrich
seinem Sůn vnnd seiner Můhmen zů Godislarr das hertzogthůmb zů Franckenn.
Darnach fordert der hailig kaÿserr. Hainrich. hertzog
Boleslaw vonn Polnn. Wann ÿm was warrhafftig anzaige gescheenn. wie
das er den seinen. seins abwesens vill schadens zůgefůgt hett. Darůmb
wolt ÿn der Romisch kaÿser verhorn. vnnd lassen zů seiner anntwort
dennoch kůmmen. Aber hertzog Boleslaw bleÿb in seiner vorigenn boshait vnnd
arglistickait vnd vngehorsam. vnd veracht das kaÿserlich Mandat. Derh
alben der hailig Romisch kaÿser. Hainrich. gein Magdebůrg zcog den
hailigenn Ritter Sant Maůriciůs anzůrůffenn. ÿn gegen dem almechtigen
wider sein feindt zůůerbitten. Darnach zcog er mit seinem here So er
zůsammen gebracht hett. gein Slamisfort vber die Elb. Also wůrden
die kaÿserische von den Reůttern die zů der Czan lagenn zům streÿt
bewegt. Derhalben die kaÿserische tetten gross Ritterlich
wehrr. vnnd also das der feÿndt ein mercklich anzal vmbgebracht
wart. Aůch wart der Stoltz Erich der vmb aines totschlags
willen von dem hailigenn kaÿser Hainrich zů den wenden geflohen
was. gefangen. vnd dem kaÿser geantwort. Darnach zcog
der hailig kaÿser nach der Oderr. vnd schicket etliche vonn seÿnenn
besten lewthen gein Crozna zů hertzog Mesick vonn Poln. diezeit da
mit ainem heer ligendt. Vnd lies ÿn erÿnnern seines aÿdts.
vnd seiner zůgesagtenn trew. Welchen Mesick also anntworth.
Ich bekenn das ich důrch der kaÿserlicher Maiestat gnad aůs dem gefencknÿs
kůmmen bin Aůch das ich eůch zůsag gethann hab. Welchs ich
alles gernn haltenn wolt. So ich freÿ werr. Aber wie ir aůch
selbs wisset Ich bin meynem Vater vnter worffenn, vnd nit meines
willens. Weÿl nůn mein Vater vnnd sein Ritterr. mir solchs
wern vnnd vorbitten. So můs ich dess wiewol vngern zů Frid sein.
Aůch wil ich mein VaterLandt. das ir sůchet. bis aúffzůkůnfft meines
Vaters Soůil mir můglich ist. retten vnnd beschůtzen. Vnnd wann
mein Vater wieder kůmbt. wil ich ÿn zů des Romischen kaÿsers. vnd
ewrm gefallen weÿsen. Welche anntwort die kaÿserische
dem hailigen kaÿserr brachten. Jn mitler zeit zcog
Hertzog Bernhart vonn Sachssen mitsambt etlichen Bischoffenn.
vnd Graůen wider Hertzog Boleslaw vonn Polnn.