bevliss er sich das. wo die kaÿserischen mit ÿrn schiffen zcogen. er alleweg
zů Ross mit den seinen nachfolget. Entlich aůff ain tag gewonen die
kaÿserische So gůtenn windt. das sie die Polnn nit kůnten eraÿln. vnd
erfolgenn. Als nůn diss hertzog Boleslaw ersah. gab er nach seÿner
gewonhaÿt die flůcht. Da nůn hertzog Bernhart vonn
Sachssenn dem hailigenn kaÿserr Hainrich vmb der vngelegenhait
willen der gegent kain hilff kůnt erzcaigenn. schicket er heÿmlichenn
zů seiner kaÿserlichenn Maiestat. fůesknecht ÿm zůerkennen zůfůgenn.
wie das er ÿm kain hilff thůn kůnt. Vnnd da er nůn vil schadens in
Polnn hett gethan. vnnd alle die selbenn gegent verhert. zcog er aůch
hinweg. vnd widerr anheÿm.

Jnn mitler zeit gewan hertzog Vlrich von Behem Hertzog Boleslaw von
Polnn die Stat Bůsingen an. vnnd totet nit weniger dann taůsent mann in
derselben Stat. An die weÿber vnnd kÿnder. die er ÿn nam. Vnnd
fieng. Vnd die Stat verbrent. Vnnd mit Sÿghafftigem heer
wieder heÿm zcog.