Aůch da Marggraff Hainrich vonn Osterreich mitsambt den
Baÿrnn erfůr das hertzogen Boleslaw von Poln Lewth beÿ ÿm ein
Nam vnnd rawb gethann hetten. eÿlten sie ÿn baldt nach. vnnd
erraichtenn sie. Vnd wiewol gedachte feÿndt ritterlich wer tetten.
Dennoch erschlůgenn sie ÿr beÿ achthůndert. vnnd treÿben ÿn die
geraůbtenn gůter gar ab. Ee aber der hailig kaÿser erfůr wie es den
seinen gieng hett er grosse sorg vmb sie. Vnnd fůgt nichts
desterwenigerr den Polnn weÿl sie Inn der flůcht warnn vill
schadens mit verherůng zů. Welchs ist gescheen
Nach Cristi gebůrt Taůsent vnd Im Sÿbenzehenden Iharr.