hailigen kaÿser mit anzaigůng aines gůtenn frids. aber Felschlichenn
wann die polnisch botschafft wart baldt von dem kaÿser fůr aÿn kůnt
schaffer erkant. Derhalben er aůch wart ein gantze nacht aůffgehalten
vnd verzcogen bissolang gar schier das gantz kaÿserisch heer vberkůmmen
was. darnach lies man ÿn wider zciehen. Darnach befalh der
hailig kaÿser die hinderstellige anzalh des heers dem ErtzBischoff
Gero vonn. Magdebůrg. Marggraff Hainrich aůs dem Osterlandt. vnd
Pfaltzgraůen Bůrckhart vonn Sachssenn in vleÿssiger bewarůng zůhabenn.
Vnd sich ÿe wol vorzůsehenn. Also zcog er ab. Vnnd war kaům vier
meÿl kůmmen. da hůbenn die feindt ÿm walt verborgenn ein vbergrÿmmig
geschreÿ an. vnd fieln zůstůndt die kaÿserische an. Aber die kaÿserische
tetenn den feÿnden Im Ersten vnd andern treffenn widerstants gnůg. Vnd
brachten ÿr aůch vil vmb. Aber zům letztenn kamen die kaÿserische
in die flůcht. vnd die feÿndt schlúgenn sich zůsammen. Vnd dranten die
kaÿserische von einander. vnd erschlůgen vnd erschossen ir vill. Derhalben der
ErtzBischoff Gero. vnnd Pfaltzgraff Bůrckhart verwůndet wůrden. Vnd kaům
mit dem lebenn daůon kamen. Aůch ain ser Edler Jůngling. Ludolff gnant.
mit etlichen gefangen wartt. Aůch wart der Edell Marggraff Gero.
mit Graff Folckmarr. vnd zweÿhůndert Reúttern erschlagen. mit grossem
Frolockenn der Polnn. Als nůn der hailig kaÿser dise betrúbte newe
mer vernam. erschrack er ser. Vnd was willens zů stůndt der seinen
schadenn zůrechenn. Vnd mit einem heerr wieder die feyndt zůzciehen.
Aber es wart ÿm widerraten. Derhalben er es wiewol ser
vngernn vnterwegen lies. Darůmb schicket sein kaÿserlich
Maiestat Bischoff Egidi vonn Meÿssenn vmb gnanten Marggraůen Gero
leÿchnam zůbittenn. Aůch das die andere mochten zů der
erdenn bestatt werden. Welches wardt erwůrbenn. Aber dess
Marggraůen Gero leichnam vnnd seÿnes gesellenn wÿderads lies er gein Meÿssen
fhůrnn. Vnnd wůrden darnach erlichen zů Nawenbůrg begrabenn.