der Stat Meÿssen trachtet. Also thet aůch Mesico. vnnd zcog
vber die Elb bey erstbenanterr Stat ann Sant Egidÿ tag ser frůe mit
sÿebenn Legion. Vonn welchen er schicket dasselbig Lanndt zůůerheren.
Die andernn verordent er die Stat zůerobbernn. Als nůn das die
Bůrgerr zů Meÿssenn in der vorstat wonende mercktenn. verliessen sie
gar schier alle ÿr gůter haws vnnd hoff vnd flohen in das Schloss
vber der Stat Meÿssenn gelegen. Derhalbenn die feÿndt
ser fro wůrdenn. das sie in die vorstat einkamen kůnten. vnd namen
das gůt daraůs. vnnd zůnten die darnach an. Aůch steckten sie das
Sloss an zweÿen enden an. Da nůn Marggraff Herman sah das er serr wenig
helfferr. hett. er zůflůcht zů dem Almechtigen Got. vnd zů seinem haÿligen
mertererr Sant Donatt fiell aůff sein knÿe mit ÿnniger bit. ÿm in
solchen grossen noten vnd obligen beÿstandt zůbeweÿsen. Aůch vermanet er
die Frawenn ÿrs vermůgens aůch wider die feÿndt zůhelffen. Welche
aůff den thůrmmen ÿrn mennern steÿn raichten vnd zůtrůgen. Vnd da
sie kaÿn wasser mer hettenn. lechsten sie das Fewer mit mette. Vnd
stilten mit gotlicherr hilff die kůnhait vnd vnsÿnnickait der feÿndt
Da solchs alles hertzog Mesico aůff dem Berg da gegen vber haltendt
ersah. wartet er seiner gesellenn. Welche das Lanndt allenthalben
mit brennen Vnd rawben bis an das wasser Gran verhert het ten. Also kamen
sie serr spet widerr vnd hetten die pferdt ser bemůhet. vnd verhofften aůff
nechstfolgenden tag die Stat mit dem stůrm zůgewÿnnen. Als sie aber sahen das
die Elb ser wůchs zcogen sie vberr. vnnd erfrawten ÿren hertzogen Mesico.

Da nůn solchs dem hailigenn kaÿserr. Hainrich. zů wissen raicht.