Schicket er zůstůndt soůil Folcks in der eÿle So er aůffbringen
kůnt. seinem Marggraůenn herman zů hilff. Aůch lies der Hailig kaÿserr
Hainrich gemelte vorstat wider bawenn. Welch werck mit
sambt der Bůrg zů Meÿssenn von den Bischoůenn Marggraůen vnd
Graůenn des Raichs Inwendig Viehrzehenn tagenn verbracht wartt.
Vnnd von dem hailigenn kaÿserr. hainrich. Graůen Friderich vonn
Eÿlenbůrg. Oder aber mer vonn Wittÿnn beůoln zůbewarn vnd zůbeschůtzenn.
Welcher aůch der Erst Bůrggraf zů Meÿssen ist genant wordenn.

Darnach zcog der hailig kaÿserr. Hainrich. in NidderLanndt. Vnnd andert
in besserůng daselbst alles das er gebrechlich befandt. Hernach
zcog er widerůmb nach dem Francken Landt. vnd hielt den hailigenn
Palmtag beÿ Bischoff Hainrich von Wÿrtzbůrg. Darnach
hielt er das hailig Osterlich Fest zů Bamberg. Daselbst beschaÿdt
er seinen vetternn den konig Růdolff vonn Bůrgůndien zů ÿm
zůkůmmen. Aber nachdem er solchs zůthůn verhindert wass.