Da nůn Graff Erick erfůr. das die Weppener wider ÿn kamen. sass
er aůff sein pferdt. vnnd nachdem er lieber wolt sterben. dann
gefangen werden. wereth er sich bis er erstochen wart. Aber die
andern Graůen dieser sachen schůldig vnd hochverwandt Als
Nemlich Wilhelm. Reinward. Wirin. Bacco. Estrico. alle
Graůen mit sambt den andern. wůrden nach Rechtsordnůng mit dem
schwerth. als beschediger vnnd beleÿdiger ader verachter der
kaÿserlichenn Maiestat gericht. Aber Bůrggraůe
Luder vonn Qůidlingenbůrg aůch ain beÿpflichter vnd anhanger
dieser sachenn wart auff grosse vorbit der Fůrstenn mit
sambt etlichen andernn in das elendt Inn Baÿrnn zům Hertzogk
Bertoldt. geschickt beÿ ym In bewarůng zůsein.