schicket er sein Botschafft zů ÿm mit grossem vleÿs bitendt. das
sein kaÿserlich Maiestat wolt zů ym gein Strasbůrg kůmmenn. Welchs
aůch also geschah. vnd teten da vil gůts vnnd freůntlicherr
wolmaÿnůng an ainander Aůch befalh die konigÿn von Bůrgůndien
dem hailigenn Romischen kaÿserr zwen Sůn. Vnd der konig vonn
Bůrgůndien macht sein Raich dem hailigenn kaÿserr. Hainrich.
vnnterthenig vnnd vbergab ÿm die kron. Inn mitlerr zeit was die hailige
kaÿserin Sa nnt. kůngůndt. Im Lanndt zů Sachssenn. vnd hett dasselb
Lanndt mitsambt den fůrsten in ÿrerr bewarůng. Aůch sass Hertzog
Boleslaw von Polnn still. vnd beschedigt des hailigenn kaÿsers Landt vnd
lewth nit. Vnnd thet nichts anders. dann das er sein Lanndt beůestett. Als
nůn der hailig kaiser widerheÿm kůmmen wass. Nach Cristi gebůrt Taůsent vnnd
darnach Im Sybenzehenden Jarr. hielt er den hailigenn Cristtag zů
Poÿlde. Nachdem nawenn Jarr zcog er gein Alstet der hailigen dreÿ
konig tag tag daselbst zůhalden. Die zeit nam der hailig
Romisch kaÿser. hainrich. ain Raÿs fůr in Nidderlandt. daran er wart
důrch vnbeqůemlickait der wege verhindert. vnd aůff ander zeit verzcogenn.

Indem bat Hertzog Boleslaw vonn Poln von dem hailigen kaÿser Frist.