Aůch das er mit der kaiserlichenn Maiestat mocht zů aÿner
freůntlichenn vnterredůng kůmmen. Welchs der hailig
kaÿserr. hainrich. nit abschlůg. Derhalbenn er aůch gein Mersbůrg
zcog dieselb sach aůszůrichtenn. Daraůff aůch der hailig kaÿser
Hainrich ErtzBischoff Erckmabald vonn Meintz. vnd ErtzBischoff
Gero von Magdebůrg. Aůch Bischoff Arnolff vonn Halberstat
Graůen Seÿfrid. vnnd Graff Bernhartt. mit sambt etlichen andern
Fůrsten abfertiget. Welche aůch darůmb vierzehen tag ann derr
Millda lagen. Vnd Hertzog Boleslaw vonn poln důrch botschafft
baten zů angesetztem tag zůkůmmen. Als aber hertzog Boleslaw die
botschafft gehort hett. gab er dise antwort. Er důrfft sich Inn
kaÿn weg an ernante gegent fůgenn. Aůch důrfft er sich vber das
wasser die swartzen Elster nicht wagenn. Also scheÿden der kaÿserischen
botschafft geschickt ab. vnd zcaigtenn dem hailigenn kaÿserr
hainrich. solche maÿnůng an. Darnach hielt der hailig
Romisch kaÿserr vnnser lieben Frawen lichtmesfest zů Mersbůrg. Dahin
die vorgedachte Bischoůe vnnd Graůen aůch kamen. Vnd nachdem vil
Ritterschafft vorhanden was. rieten sie alle das der hailig
kaÿser Hainrich solt hertzog Boleslaw von polnn abermals mit
ainem heer vberzciehenn. Aber er wolt nit darein vorwilligenn
Sůndern zcog darnach gein Magdebůrg. da er mit grossenn Eren
enpfangen wart. Vnnd lies vil dib morder vnd rewber abrichtenn.
Von dannen zcog er gein halberstat vnd Qůidlingbůrg. Da er an der
kirchweÿhůng in dem Iůnckfraw Stifft aÿn pfůndt golts aůf den
altar opffertt. Darnach zcog er gein Godislarr.
Da er Vier wochenn bleÿb. Welche Stat er aůch sůnderlich Liebt
vnnd zcirt Dahin fordert er aůch die Fůrstenn des hailigen
Raichs vonn zůkůmfftigem krieg zůratschlagen. vnd Wiewol er
merckliche grosse obligenn vnd geschefft hett . doch wolt er sich
in kaÿn weg an dem gotlichenn dinst. lassen verhindern. der
hailigenn fasten Inniglich aůszůwarten. Vnd hielt den hailigen
Palmtag zů Meintz. vnd darnach die hailige Ostern zů Jngelnhaÿm
Weÿl aber die Stat zů klaÿn vnnd zů eng was. wart der Raichstag
gein ache verlegt. Da zwischenn dem hailigen kaÿserr Hainrich
vnd Bischoff Ditterich zů Metz. aůch seinem brůder hainrich frid
gemacht wartt.