Da der hailig kaÿserr. Hainrich. zů Ache nach endůng des Raichtags
aúffbrach. erfůr er das sein eelich gemahell die hailige kaÿserin
Sannt Kůngůndt. wider gesůnt was wordenn. Vnnd ÿrr
gelůbd erfůllet Derhalben er dem almechtigenn gar
demůtiglichenn dancksaget. Vnd als er nůn die hailige Pfingsten
zů Wirtÿn in des hailigen Bischoffs Lůdtgers Closter gehaltenn
hett. fordert er die hailige kaÿserin Sant kůngůndt zů ÿm gein Padebornn.
Von dannen zcogen sie baide gein Magdebůrg. Da ÿr kaiserliche
Maiestat von dem ErtzBischoff Gero. vonn aller gaistlickait. Vnnd
allem Folck. aůffs loblichst vnd erlichst wůrden angenůmmen.