zůmachenn. Aber als nit gescheenn was. schicket der hailig kaÿser Hainrich
benanten hertzog zů seÿner schwesternn Jn mitler zeit hertzog
Mesico in Behem zcog. aůff beůelh seines Vaters. Vnnd vberfiell dasselbig
Lanndt hertzogenn Vlrichs vonn Behem mit zcehenn legion. vnnd thet
inwendig zweÿenn tagen ein vbergrosse nam. vnd fůhrt vil Folcks mit
sambt grossen gůternn mit ÿm in poln. dess sein Vater hertzog Boleslaw
hoch erfrawet wartt. Derhalben aůch der hailig kaÿserr
Hainrich. mit seinem Folck vnnd den Behem starck vnd ser wol gerůst.
aůszcog. vnnd alles Verhert was vnnter wegen was. Vnd kam am Fůnfften
tag Aůgůsti fůr die Stat Glogowa. da hertzog Boleslaůs vonn Poln mit
grosser sorgfeldickait des hailigenn kaÿsers warthet. Vnd der hailig kaÿserr
verbot seinem Folck nit zů eÿlenndt sich mit den feÿndenn zůwagen vnd
Inn streÿt zůgeben. Darnach schicket er zwelff Legion fůr
ain andere Stat. dieselb in gúter bewarůng zůhabenn. Vnd zůwern das
derselben Stat das Folck. So fůrwartt nit mocht zůkůmmen. Vnd als
sich dise gedachte Legion hettenn gelagert. kam das geschreÿ. wie die feÿndt
vorhandenn wernn. Also folget ein ser finsterr nacht. mit eÿnem grossen
regenn. dadůrch die kaÿserische verhindert wůrden. die feÿndt die
wegkúndig warnn. niderzůlegenn. Derhalbenn brachten sie die feÿndt zům
tail in die fl ůcht. Vnnd zům tail liessenn sie wider in die Stat zciehenn.
Vber dreÿ tag darnach folgt der hailig kaÿser. hainrich. mit seÿnem gantzen
heer. vnd belegt die eegnanten Stat von allen seÿtenn. Aber die dem kaÿser
darzů solten helffenn warn zů vnvleissig Derhalben aůch etlich Frembd
Folck in die Stat kam. Daraůff der hailig kaÿserr lies alle sachen zům Stůrm
růstenn. vnd an die Stat maůrn schantzen. Aber die in der Stat teten gross
wer. vnd verbranten allenn gezewg an die maůrn gebracht.

Da nůn der hailig kaÿser merckt das bescheen vnnd kůnfftig můhe vnd kost