Darnach fiel der hailig kaÿserr zu Bamberg in schwacheit vnd wart dadůrch
vil zeit verzogen vnnd verhindert aůszůraÿsenn. Als ÿm aber der almechtig
sein gesůnthait wider gab. erhůb er sich gein Magdebůrg zůzciehenn.
vnd hielt aůff der selben raÿs den hailigenn Palmtag zů Alstet. Darnach
den hailigen GrůnDornstag. vnd CharFreitag zů Můnchnawenbůrg Am
hailigen Osterabent. zcog er mitsambt der hailigenn kaÿserÿn Sant
Kůngůndt. vnd mit einem grossen zewg zů Magdebůrg ein. Da sie
aůch vonn dem ErtzBischoff. der gantzen gaistlickait. vnd dem gemaÿnen
Folck. gar erlichenn wůrden angenůmmen. Vnd hielt das hailig
Oster Fest zů Magdebůrg. Vnd da der hailig kaÿser vonn dem
ErtzBischoff daselbst mit gůlden stůcken vnd vil seÿden klaÿdernn
begabet was. zcog er gegenn Halberstat. Von dannen gein Godislar
vnnd darnach vber zcehenn tag gein Grona.