Beÿ disen tagenn hat in ainem dorff Im Lanndt zů Sachssen einer gnant
Otbrecht mitsambt Achzehen gesellen. Nemlich Fůnffzehenn mennern vnd
dreÿen weibern in der hailigen Cristnacht. vnter der Cristmes aúff
dem kirchoff ein dantz gemacht vnd darůnder weltliche lÿed gesůngenn.
vnnd den Priester herr Robert oder Rúprecht genant der das hailig Ambt
hielt in seiner andacht also verhindert. das er vnnter der mes. ÿn wiewol
vngernn. vnd wider sein willenn nachsang. Derhalben er ÿn gebot
zůschweigenn. Als sie aber nit schweigenn wolten. wůntzet er ÿn also.
Got vnd Sannt Magnůs (. welcher derselben kirchenn hawbtherr was. ) gelib
das ir das ganntz Jar aůssinget Wie aůch geschah. Vnnd ain
pfaffenn Sůn erwůchst sein schwesternn beÿ ainem arm. vnnd reÿss
yr denselbenn an alle blůtvergiessůng vom leÿb. Aber sie bleib
gleichwol mit den anndern am tantz Vnd dantzten vnd sůngen also ein
gantz Jaraůs. Inn welchem sie nicht berege nt wůrden. Aůch
wider kelt noch hitz. wider hůngerr noch důrst fůltenn. Jr schůhe
Vnnd klaÿder zůrissenn aůch nicht. Vnd versůncken darnach In die
erden. Erstlich bis an die knÿe. vnnd darnach bis in die mitt. Entlich