da das Jar vmbkůmmen was. wůrdenn sie vonn hern Heribrechtt ErtzBischoff
zů Colnn vor Sant Magnůs altar wider absolůirt. Darůnder des
pfaffenn tochterr sambt andern dreÿen von stůndt starb. vnd die
andernn dreÿ gantze nacht aneinander schlieffen. vnd nach ÿrem
tot wůnderzaichen tetenn. Dann sie hettenn grosse rew vor ÿre sůnt
entpfangen. Vnd ist gescheen nach Cristi gebůrt Tawsent vnnd
Im dreÿzehenden Jarr.

Die zeit entfůrt hertzog wratislaw von Behem. hertzog Vlrichs von
Behem Sůn das frewlen Jůdit Marggraůen hainrichs von Norckaw tochterr.
vnd Marggraúen vonn Sweinfůrt schwester. beÿ nechtlicher weÿl aůs ainem
Jůnckfraw closter zů Regensbúrg. darInn sie erzogen vnd vnterweist wart.
vnd reÿt mitsambt ÿr. vnd wenig seinen dienern darůon. Vnd nachdem etlich
sein diener den aůch solche sach vnbewůst war. hinter Im blÿben
warn. wůrden etlichen die awgen aůsgestochenn. etlichenn die nasen
abgeschnitten. Aůch etlichenn ÿr hende vnnd Fůss abgehawenn.