Darnach legt sich dieser Romischer kaÿser fůr die Stat Rotomag.
Weÿl aber der Winter anbrach. vnnd die gegent der belegůng
vngelegen was. aůch kaÿser. Otto. schadens halben nit beqůemlickait
hett lenger dazuliegenn. Da er dreÿ monat vor der Stat gelegen
was. vnnd nichts frůchtbarlichs. aůsgericht. zcog er wider in
Sachssenn. Vnnd was er gewůnnenn hett. gab er konig.
Lůdwig. von Franckraich seinem Swager wider. Vnd setzt ÿn
wieder in sein konigRaich. Vnnd wiewol Graff Hůgo.
aůch seiner Swester eine hett. Doch hallff er Ere vnnd tůgenthalbenn
dem konig von Franckraich wider seinen andernn Swagerr.
Vnnd vnter solchen hendeln allen. Graff Hůg sich nÿe zů der were
mit ernst stellet. Nachdem kaÿser. Otto. ÿe begegent.