Wie stoltz vilbenanter Graff was. doch dorfft er sich nie keÿn mal wagen
mit dem Romischen kayser zůstreiten. Weyl nůn der Romisch
kaÿser etlicher vrsachen halbenn wider heÿm In Sachssen gezcogenn
was. kam er nechst folgenden Jhars wider. mit einem grossenn heer.
in Franckraich Aber nachdem Graff hůg erkent das all sein
fůrnemen vergebens wer zcog er dem Romischen kaÿser vnter aůgen
am wasser die Kar gnant. vnnd bat vmb gnad. die er alda erlangt.
vnnd sich mit dem Romischen kaÿser. Vnd dem konig vonn Franckraich.
gar In demůtiger vnterthenickeyt richten lies. Vnd blib der
kayserlichen Maiestat hinfůr nůtz vnd getrew. Wann er mocht sein
Landt vnd Lewt nit mer vnd hoher lassen beschedigen vnnd verterben.
Vnnd der Romisch kaÿser erzcaigt sich allenthalbenn also das ÿn
die Normandeÿer in keyn weg dorfften fůrnemen mit ÿm zů streÿten.
derhalbenn sie aůch ganntz still vnd an alle enporůng sassenn.
Dieser Graf hůgo ist genant wordenn. der Gros hůgo vnd entlich
Konig zů Franckraich geworden