Als nůn alle Lanndt in Franckraich. vnnd vil Landt in deůtzschen
Nacion gůten frid hettenn. starb Hertzog. Bertoldt. vonn Baÿrn
an leÿbserben. der wider die Vngarn glůcklich gestrÿten vnnd sie
vberwůndenn hett. Derhalbenn dieser Romischer kaÿser aůff
vleisig vorbit seiner můtter der Romischen konigÿn Frawenn.
Mechtildt. sein brůder Hertzog. Hainrich. zů ÿm fordert. vnd
wider zů gnaden nam. Vnnd ym das Hertzogthůmb zů Baÿrn leÿh.
Etlich schreiben das Hertzog. Hainrich. seÿ in rew getreten seins
vnbrůderlichen gemůts seinem brůder dem Romischen kaÿser manchfeltiglich
ertzaigt. vnd seÿ aůs eÿgener bewegůng kůmmen. Vnnd dem
Romischen kaÿser zů fůssenn gefallen. Vnd also wider zů gnaden
genůmmen. Wie In hertzogen. Hainrichs. leben folgenn wirt.