Da nůn der Romisch kaÿser. Otto. also sigenreich was in allen seinen
kriegenn wart er wůnder hochberůmbt. vnnd kam in grosse forcht.
vnnd gůnst vil konige vnnd Landschafft. Derhalben er aůch důrch
botschafft. der Romer. der kriechen. vnnd der Saracen ersůcht wardt.
Vnnd wart vonn ÿnen begabt mit gůldenen vnd silbern vnd andernn
vberkostlichen claÿnoten. Welche alle aůffs aller ertichst gemacht
warn. Aůch mit Deppeten. Balsam. vnd den allerkostlichsten gemelden.
vnd dergleichenn die Sachssen vormals nÿe gesehenn hetten. Aůch
wůrden dem kaÿser lewen. Camel. Straůssen. vnd vilfaltige wůnderberliche [lies: wůnderherliche]
thier geschenckt. zů bedeůtůng. also stůndt die hoffnůng aller
sachenn der hailigen Cristenhait in seiner kaiserlichen Maiestat vnd
hanthabůng. Aůch das der vnglaůbigen standt vnnd wesen in seinen
handen wer. In solchen seÿnen hohen vnnd blůenden Eren. entdeckt
er seiner wirdigenn můter. vnd seiner seligen Fraw en. Aůch
den Fůrsten des Landts sein gemůth mit der Erbawůng vnd aůffrichtůng.