eÿner Apteÿ zů Magdebůrg. Vnd bat ÿrn Rat. damit er weÿs Hett sein
gelubd zůerfůllenn. Welchs sein fúrnemen sie alle hochpreistenn. vnd
seiner bit. gros stat gabenn. Derhalben er stifftet zů Magdebůrg
ein Abteÿ. vnnd fieng an zůbawenn ein vberschone kirchen. an der
stat. da Sant. Edith. Oder Sant Egith sein erste gemahel begraben ist
Da er aůch selbst nach seinem tot rastenn wolt. Demnach er aůch
vil merglicher grosser gůtter dem almechtigen Got. vnd seinem hailigen
mertererr Sannt Maůricien erblich gab.

In diesen hendeln. vnnd vnter manchfeldigenn glůcklichen Sÿg. wart
der Romisch kaÿserr. Otto. gar hochlich důrch totlichen abgang seiner
seligen gemaheln der Romischen konigin Frawen. Edith. betrůbt. Vnnd also.
das er wiewol er vil widerwertickait hett. Vnnd In vil Landenn
kriegenn můst. keÿn grossern schmertzen het. vnd merer betrůbnÿs
dann von seiner Frawen toth. die ÿm starb nach Christi gebůrt
NeůnHůndert Vnnd Im SybenvnndViertzigstenn Jharr.