er ein Newen Hertzogenn zů Sachssen. Dem er gab den Titel des
Hertzogthůmbs zů Sachssen vnnd Lůnebůrg. Wie er aber dasselbig
Hertzogthůmb Lúnebůrg hab aůffgericht sein dreÿerleÿ maÿnůng.
Dann etlich Cronicka habenn also. das er darzů bewegt seÿ. darůmb
das er kůrtz darůon ein mercklichen schaden von leůten in Behem
erlidden die ÿm zůsambt seinem Obirsten feldthawbtman Graff Esick
von Mersbůrck vnnd seinem Heer schier gar erschlagen was. In
etlichen Cronicken findt man das dieser Romischer kaÿser darůmb
das hertzogthůmb von Lůnebůrg aůffgericht hab. Vnd Inn frembd
vnd vnbewant geblůt vnd geschlecht gebracht. das sich der seÿnenn
vil aller vngebůr vnnd vntrew gegen ÿm bevlissenn. vnd ÿm fůr
entpfangen manchfeltig sůnderlich gnad. gůttat. vnd wolmaÿnůng. alles
vbel erzceigten. Die dritten sagen dieser
Romischer kaÿs er hab ein hertzogenn zů Lůnenbůrg vnd Sachssen
gemacht. kůrtz darůor ee er den Rom weg hab genůmmen den
Bebstlichen Stůl. vnd gantz Jtalien von dem Wůterlichen Regiment
konigs Berengers zůerlosen. auf das sich seins abwesens kein
enporůng begeben von den vberwůnden Lanntschafften aůs
gebrechen gůter Regenten. Aber wie dem. so sein des etlich
Cronick eintrechtig das dieser Romischer kaÿserr. Otto. der
Gros hab zů dem ersten hertzogen zů Lůnenbůrg gemacht. eÿn
Edelman genant Herman von Stůppeshornn. Willings von
StůppesHorn Sůn. Welcher willing von Stůppeshorn
eÿn armer edelman was. vnnd nit mer dann sÿben hůfen Landts. soůil
pawrn. vnnd etlich hofe beÿ Soltaw hett. Vnnd nam eyns
Edelmans von Soltaw tochter. Mit welcher er zwen Sůn hett.
Herman den Ersten hertzogen zů Lůnenbůrg. Vnd Wÿgmann
ein Graůen. Von welchen Wigman. dem Romischen konig.
Hainrich. dieses Romischen kaÿsers. Otto. Vatern So wol vnnd
trewlich di ent. Vnd so geschickt vnd streitbar war. das er nach
vberwindůng. der Vngern. vnnd Denen zů eÿnem Graůen gemacht. wart.
Vnd vil andere grosse gůter erlangt. des er sich so hoch erhůb
das er seÿnen brůdern gar vnerlich hielt. vnd allenthalben verachtet.
Aber Herman von Stůppeshorn. Darnach hertzog von Lůnebůrg vnnd
Sachssen lies sein brůder. Graůen Wigman seiner vntrew vnnd
vnůernůnfft nit entgeldenn. Sondern ertzaigt ÿm nit weniger
brůderlicher trewmaÿnůng. Dann wenn er keyn verdries von ÿm
gehabt hett. vnd stelt sich allenthalbenn dermassen. also merckt
er gar keÿn vnwillen vnd vnnaÿgůng. Dan er was ein ser
Adelicher Jůngling. grosser natůrlichen schicklickait. Vnnd
von gar tugentlichen loblichen sitten. Vnd ertzaigt sich in seÿnen
Iůngen vnd menlichen Iharn gegen ÿderman. Also das er