Es schreiben etlich das Pfaltzgraff. Eberhart. vom Reyn die zceit
noch gelebt hab. Vnd nachdem er sey. erzcornet wordenn. vber
Graůen Brůning. hab er ym Elmeraw sein stat zů grůndt
verbrant vnnd zestort. vnnd erschlagen alle einwoner derselben
Stat. Derhalben der Romisch kaÿser. Otto. den pfaltzgraůen
vmb hůndert pfůndt goldes gebůsset hab. Die andern Fridbrecher
wůrden aůch mit verdinter straff gezůchtiget. Aber entlich nam sie
der kayser aůs seiner gewonlichen gůte. in genade. vnnd Ereth sie
mit koniglichen gaben. lies sie mit frid vonn ym kummen. Aber als
man beÿ etlichen findt. verachten sie solche grosse kayserliche gůte
vnd gnad vnd hiengen vil serer an pfaltzgraůen. Eberhart. mit
sambt ÿren freůnden. dann sie vor ÿe gethan hetten. Dann
dieser pfaltzgraff was gůtig. gelimpffig. sprechbarr. vnnd mild.