mit welchen er ÿm vil Sachssen zů freůndt gemacht hett. die heimlich
wider den Romischen kaÿser. Otto . handelten. Es kam aůch mit dieser
zwitracht dohin. das offinlich. schlacht. Placken. vnnd Rawbereÿ. aůch
brende geschahen. an alles aůffhoren. Vnd důrfften dennoch sprechen
sie nemen nichts wider die kaiserlichen Maiestat fůr. Sůndern allein
die ÿren zu rechen. Aber der kayser tet dergleichen als merckt er es
nit. Vnnd nachdem er mit einem ewigen gesetz verordent hett das die
freůntschafft solt die Erbgůter in dem dorff Stela. bey der Elb gelegen.
tailn. hies er die Friedbrecher fůr yn kůmmen. Vnd wiewol sie nit kamen.
dennoch verzůg er sie mit ernst zůstraffen. In maynůng sie aůch in
gnaden zůnemen. So sie es begert hetten. Aber solch gútig verweÿlen
des kaÿsers. Otto. kam zů verderblichem schaden. der zwitrechter vnnd
Fridbrecher. dann weil sie yr vnbillich fůrnemen nit abstelten. kamen
sie in grosse scheden.

Wiewol nůn gnůgsam vnd clar zůůermercken ist aůs erst erzelten