Vnter welchen Graff Eckhart sůnderlich misfallen hett. in des
newen Hertzogen glůck. vnnd wolgeen. Vnd also das er geredt vnnd
gelobt. vil grossere hendel aůszůrichten. Oder er wolt nit leben. Vnd las
die besten lewth aůs dem gantzen here. vnd streÿt mit den feindenn
wider das kaÿserlich gebot. Er wardt aber von den feinden vmbgeben.
Vnnd mitsambt achtzehen den fůrnemsten vnd besten in dem gantzen here
erschlagen Deshalb der New Hertzog grosser vngůnst
Vnnd widerwillenn verdient.

Dieser Hertzog. hermann. von Sachssen vnd Lůnenbůrg hat wider
gebawet das Schlos Lůnenbůrg aůffs aller vest. So vonn kaÿser
karll. eingebrochenn war worden. Vnd machet Můnchen sancti
Benedicti Ordens. aůs den Reglernn.