Nůn hett dieser Romischer kaÿser soůil lobs vnnd preÿs vonn der
konigÿn. Adelhait. schon vnnd tůgent erfarn. das er ÿr so
gnedigen willens geneÿgt wart. das er beÿ ym beschloss. sie zů
seÿnem eelichen gemaheln zůnemen. Auch schreibenn
etlich er hab sie derhalben ÿres gefencknÿs ledig gemacht. Vnnd sie
mit grossem geschenck begabt. Aber eygentlich haben etlich
alde Cronicka das er hab seÿ [lies: seÿn] trefflich botschafft aůs Paůÿ
als er dieselb Stat erobbert hett. geschickt. Vnnd sie zů
seÿner eelichenn gemaheln ÿm lassen vertrawen. Vnter anderm
vilfaltigen freůntlichen erbieten. sie solt wider in der Stat.
in das Raich kůmmen. Inn welcher sie darůon entsetzt wehrr.