antwort vmb zehenn schilling. Deshalb der Fůrst gesellschafft mit ÿm
macht. vnd hies ÿm aůch zehen schilling gebenn. Als nůn der kramer hin
vnnd wider zcog ertzaigt er sich Jherlich dem fůrsten ain mal. Vnnd als
er vil gewůnnen hett. lies er die gering kremereÿ farn vnd gebraůcht sich
allain guldener vnd silberer claÿnet. Berlen vnnd Edelstein. Von
welchem er Jherlich dem Fůrstenn etwas gab. Nůn mert sich sein kram also
ser das er den nit mer tragenn mocht. vnnd kawfft einen Esell. der
Im den trůg. Vnnd als er ains vonn Venedig zcog mit grossem schatz
den Fůrsten wider zůbesůchen leget er zů Wÿrtzbůrg seinenn kram aůs. geldt.
daůon zulosenn. Nůn sahen etlich Edellewt oder mer rawber dise
kostliche klaÿnet hÿlten ÿm fůr. zurissen ÿm seinen gleitzbrieff. vnd
mamen [lies: namen] ÿm den kram. Nůn was er ser erschrockenn vnd kam mit betrůbten
gemůt vor den Lantgraůen. Vnd clagt wie es ÿm ergangen wer. Derhalbenn
lantgraff Lůdwig baldt mit heer in Francken von ainem Sloss zů
dem andern zcog alle gegent daselst [lies: daselbst] verhert. bis gein wůrtzbůg zů dem der
Bischoff sein botschafft schicket zůbeforschen aůs welcher vrsach er
sein Landt also verhert. Dem der Lantgraff antwort. Jch sůch den Esell.
den die Edellewt meinem gesellen genůmmen haben. mit seinem krame Da
diss der Bischoff hort musten die Edellewt. von stůndt an den Esel mit den.
kleÿnaten vberantworten. Vnd zcog frolich heÿm. mit seinem gesellen.

Darnach begab es sich das etlich kawfflewth von Důringn vnd Meÿssen