Wir gelobenn vnnd schweren Hainrich dem Marggraůen zů Meÿssen vnnd
Lawsatz. Als vnserm rechten Erben vnd herren getrew vnd gewhr [lies: gewehr]
zusein mit leÿb vnd gůt. vnd Lůdwig dem Lantgraůen zů Důringen.
als seinem vormůnden. Jnn der gestalt. Ab hainrich vnnser Herr.
Innerhalb seiner menlichenn tag stůrbe. das wir alsdann disenn
Lanntgraůenn zů ainem herren vnd Marggraůen diser baÿder marck.
als einenn rechten erben erweln mit disem aÿdt. So war vnns Got helff
vnnd die hailigenn hie gegenwertig.

Nun hett diser Fůrst ain frÿd gemacht vnd beÿ verlierůng des lebens
zůhaltenn. geboten. Deshalb er zwen Fridbrecher in dem Lanndt zu
hessen enthawbten lies. Der ain was Groping ein Sůn Dittrichs
des grossen genant. Der annder wart genant Nesicken. Vonn
welches wegenn ÿn der ErtzBischoff vonn Meintz hasset. Der ÿn
sprach in dem bann sein. von deswegen das sein vater in dem bann