gestorbenn were. Wann derselbig sein vater den Graůen von Orlamůnde
zu weÿmar gefangen hett. Der da vonn lessickait der hůter entlieff.
Derhalbenn er dieselbenn hůter mit ÿrn weibern hertiglichen in gefencknÿs
schloss Aůch die vnschůldigenn das ÿn die brůste fawltn. Daůon sie
vom gestanck storbenn. Derwegen der Fůrst ser trawrig wart.
Vnnd mit vleÿs darnach stellet. das er den Vater aůs dem bann
brechte. vnd wart zů Fůlda in dem stifft bald darnach mit dem ErtzBischoff
veraÿnet. vnnd mit dem vater absolůirt.

Als nůn diser Lanntgraff ser gestreng was. vnnd den Frÿd ernstlich
zů halden meÿnet. kam er offt in Meÿssenn vnd Lawsatz.
die Lanndt zůbeschawen. Von deswegenn sein Swesterr
dawcht. wie sie an ÿm nicht ain vormůnden. Sůndern ain herren
hett. vnd wart ÿm feÿndt. Deshalben zwischen ÿn baÿden
ein heimliche widerwertickait zů vbell der Landt entstůndt.